Nalaatsorneq...
Ukiut arlalit matuma siorna Kalaallit Nunaannut pigama uigalu Kalistat naapikkakku, nerisassat erniinnaq akornatsinni "qilerutinngorput". Nerisassat tunngaviusumik attaveqaqatigiiffigilerpagut. Frankrigimi mikisuaraallungali nerisassat tamatigut asanninnermik pissarsiffiullutillu asanninnermik tunisisarput, aamma tamanna Kalaallit Nunaanni naammattooqqissimavaa.
Nerisassat aqqutigalugit ulluinnarni attaveqarneq...
Savaatilinngorniat ilinniarfiat Kujataani Upernaviarsummiittoq tikeraarpara, tassani qatanngutiga sulivoq. Arnartatuaavugut angutit inuusuttorpaaluit akornanni. Angutit nuannaarutigivaat ullut tamaasa kulturimik nutaamik misigisaqartarnertik, nerisassat sassaalliutigineqartut aqqutigalugit.
Kalaallit Nunaat uannut nutaajuvoq aamma avatangiisit immikukajaaq ipput, killilerujussuarmik oqaloqatigiisinnaavugut. Taamaattumik nerisassat erseqqissaataalerput: misigissuserpassuit eqarsaatillu kiinnami takuneqarsinnaasarput nerilernermi, taama isumaqarpunga!
Franskit sorlaanniit kalaallit kulturiannut
Qaammatit arlalialunnguit kingorna klaveerera, imilertakkanik qalipakkakka nerisassiornermilu najoqqutassaatikka nassarlugit Kalaallit Nunaannut nutserpunga, savaatilinngorniat ilinniarfianni igasunngoriartorlunga.
Pitsaasunik nerisassiorneq meeraaninniit uummammioraara. Frankrigip kujataani anaananniit ningiunniillu kingornutaraara.
Upernaviarsummi, avinngarusimasumiittumi, ikittuinnarnik inoqartumi ullorpassuarni illoqarfimmut attaveqarsinnaassanngilagut. Tamaani sukumiisumik nukikka atortarpakka pitsaasunik nerisassiornermut. Isumagissaarnartitsisarpoq tamanullu suleqatigiilluarnissamik tunisisarluni. Nerisassaq ataatsimuulersitsisarpoq.
Kalaallit nerisaqariaasiat franskit nerisaqariaasianniit allaanerujussuuvoq - Kalaallit Nunaanni nerisarput "aqajoroq immerniarlugu" nukissaqarniarluni. Frankrigimi nerineq nalliuttorsiorpalaarnertut pissusilersornerusarpoq. Kisiannili immitsinnut ataqqinissarput ilinniarsimavarput, nerisassallu pitsaasut agguataartarlugit.
Nerisassiorneq soorlu tassa qalipaaneq
Illunik titartaasartutut (arkitekt) ilinniagaqarsimavunga, taassumali saniatigut nuannaarutigiuaannartarsimavara nerisassiorneq, soorlu aamma nipilersorneq, titartaaneq qalipaanerlu nuannarigikka.
Nerisassiornermik najoqqutassaatikka nerisassiornermillu atuagaatikka atortarpakka eqqumiitsuliornermik atuakkanik qimerluuisarnertut: isumassarsiorniarlunga. Taava periarfissat akoorutissallu nassaarisinnaasakka eqqarsaatigisarpakka, taamaliornikkullu tamatigut najoqqutassiaq nassaareqqinneqartarpoq!
Nerisassiortarpunga soorlulusooq titartaaginnartunga qalipaaginnartungaluunniit: eqqarsaatinni, nerisassanut akoorutissani nassaarisinnaasanni, igalaamiit isikkivigissoq asanninnerujussuarlu "ilusillit".
Ipiutaq guest farm-imi mamarluartunik nerisassiornermi najoqqutassat
Upernaviarsummi savaatilinngorniat ilinniarfianni ukiorpaalunni igasooreerlunga, Kalistat peqatigalugu maanna Ipiutami "neriniartarfiuterput" sanalersimavarput, Narsarsuarmiit ungasinngitsumiittoq.
Ipiutaq guest farm-imi sulinera tassaavoq nerisassiorneq tikeraartutsinnillu kajunnguteqartarneq. Nerisassaatikka assitalersukkat nerisassiornermilu najoqqutassiat takuneqarsinnaapput nittartakkatsinni www.ipiutaq.gl. Ilaatigut takukkit aalisakkanik suppaliaq, boor´lut kuannit pilutartalikkat aamma Ipiutaq chutney.
