"Oqaaseq" nammineq oqariartaasiuvoq danskisooq - kalaallisullu oqaatitut paasineqartarluni.
Aallaavigivaa danskit illumi ningiuusut oqaasiat - pitsaanerusumik amigaateqarnermit - kiffaminnik oqaloqateqaraangamik atortagaat. Kalaallisut
kaffisoriaqqusiinnartoqartarppoq.
Kaffemik ileqqutoqqatut immikkut ittuuvoq. Kaffillertoqartarpoq suugaluannguluarluunniit pissutigalugu: inuuissiornermi, katittorsiornermi, apertortinnermi il.il.,
kisiannili aamma soorlu meeqqap qiteqqunnerani. Qanga naalungiarsuit toqujaarpallaartarneri pissutigalugit, nalliuttorsiorfissatut nalunaaqutarineqartarpoq,
naalungiarsuk taama sivisutigisumik inooreraangat. Aamma meeraq upernaakkut atualernissamut allatsikkaangat, aggusutusillu aallartinnerani atualeqqaaraangat
kaffillertoqartarpoq. Sunaluunniit siullerpaaq nalliuttorsiorfiusarpoq pingaartoq, aamma atualernermi malunnartinneqartarpoq meeraanermi inuunermut immikkoortumut
allamut nikeriarneq.
Ilaquttat najuuttut, asasallu allat eqqarsaataannakkut tikinneqarsinnaasut, nalliuttorsiutigineqartarput. Nunarput angisoorsuuvoq, ilaquttallu
siammarsimasorujussuusinnaasarput, tamatumanili akor-nutaanngilaq "ataatsimut" nalliuttorsiornissamut. Aamma ataqatigiinnermut ataatsimooqatigiinnermullu
upernarsaataasarpoq.
Kaffi 1800-kkut naalerneraniit najooqagassaavoq piumaneqaqisoq aamma nalinginnaasumik kaffi-mik atuisoqartorujussuuvoq. Ima atuisoqartigaaq, ileqqorissaartuusunut
isumakulutsisalersimalluni - danskit kalaallillu akornanni - taakku kaffi inunnut sanngiillisaataasutut isigivaat. Kaffiliassat suliarineqanngitsut pisiarineqartarput,
angerlarsimaffimmi sikatseruloorneqartarput, aserortertinnagit. Kaffiliassat sivisuumik pigineqarniassammata, suaasakuluunik, suaasat qaqortunik eertanilluunniit
kajortunik akuneqartarput. Kaffi kimittuunngorlugu akunagu imerneqarnerugajuttarpoq. Najooqqarneqartarpoq kaffimut kiilup affaanut sukkut manngertut ¼ kg.
Niuertoruseqarfinni pilimasut, soorlu naammattunik uumasuutillit, nersussuup savaasalluunniit immuanik kaffi akusarpaat. Allat orsoq atortarpaat, kaffisukkap
qaavani ammalortunngorluni puttasartoq. Ullumikkut kaffisor
tartut ilaasa, pingaartumik Avannaamiut, tuttup tunnua kaffimut akuliuttarpaat. Qangaanerusoq
kaagi seqquluttulersulikuluugaq kaffisuutigineqartarpoq. Ullumikkut kalaallit kaagiannik taaneqartarpoq. Suli mamarineqaqaaq, iffiorfiit
tuniniagassatut kaagiliarisarpaat allaat.
Kaffillernermi kaagit nammineq iffialiat sassaalliutigineqartarput, ullumikkullu kaagit assigiinngitsorpassuusarput, pinngitsoorneqanngisaannarput lagkaagit
poor´lullu punnilikkat. Ningiuulluartup paarmat atortarpai - paarmat kigutaarnallu - kaagiliornerminni, nassaarniallaqqisorujussuusarput, iffiornermut najoqqutassiat
"kalaalinngorsarneqaraangata".
Ullaaralaaq kaffillertoqalersarpoq, ualilluarnera tikillugu. Kaffisoriat isaajuartarput, kaffisornissamullu piffissaq kaffisoriat namminneq naleqqussartarpaat,
taamaalillutik isaasut inissaqarniassammata. Inissaaleqisoqaleraangat, sivisunerusumik issiasimasut issiavitsik iserlaanut tunniuttarpaat. Illoqarfiit mikisuummata
aamma inuit tamarmik ilisarisimammata, sivisuumik issiasariaqanngilaq - naapillattaaginnartuugamimmi. Pinngitsoorneqarsinnaanngilarli kaffisoriaqqusaasigaanni
aggernissaq.
Qanormitaava tii? Ila aamma taanna najoqqagassaavoq piumaneqartaqisoq, nalliuttorsiornermisuulli pingaartiginngitsoq. Tii qanga ullumikkullu ulluinnarsiutaavoq.
Kaffiliornermiit pisariunnginneruvoq aamma angalaarnermi nassarneqarsinnaavoq. Uunnaavik angalaarnerni aalajangersimasumik nassarneqartarpoq,
imaatigut nunakkullu angalaarnermi. Aamma tii meeqqanut sassaalliutigineqartarpoq, meeqqerivinni iveeralerlugu sassaalliutigineqartarpoq.
Iveeqqat kaffillernermi sassaalliutigineqarajuttanngillat, nalissaqartinniaraanni alliartuutigisimasariaqarput.
