Kuanneq Kujataani tamangajammi naasarpoq.
Kuanneq nutaatillugu nerineqarnerusarpoq. Naasunit anngajaanit siullerpaalluni aasaleqqaarnerani naasarpoq, mamarsaatigilluarneqartaqaaq.
Kuanneq seernartuligassaqqippoq, kinertuliassaqqippoq, mamalaadiliassaqqippoq, iffiukkanut akuutissaqqippoq igaanullu akuutissaqqippoq.
Aamma kuanneq panersigassaqqippoq, Kujataanilu savaatillit arlallit panertunik kuanneerniartarput, ukiuunerani atorneqarsinnaasunik.
Paarmat (Empetrum nigrum)
Paarmat Kujataani tamani naasuuvoq. Paarmat tungusunniaartuupput, naajjartornerminni ujarattai seernalaartut.
Paarmat qangaaniilli nerisassanut allanut akugalugu pingaaruteqarluinnartuuvoq. Ukiakkut nunianneqartarpoq, nunianneqarsinnaanngornissaallu qilanaarineqartaqaluni.
Paarmat tingulaaliarineqartarput, taanna qangaaniilli mamarsaatigineqartuartuuvoq.
Paarmat aamma kaagiliornermi akugineqartarpoq, geleliarineqartarpoq aamma kingulleqqiutigineqartarlutik.
Kigutaarnat (Vaccinium uliginosum)
Kigutaarnat aamma Kujataani tamangajammi naasarput.
Kigutaarnalli paarmatut amerlatiginngillat, paarmatullingajak nerisassiarineqartarlutik.
Kigutaarnaq isseqarluartuuvoq mamarluartuullunilu.
Kigutaarnat mamalaaliarineqartarput, kaaginut akoorutigineqartarput, sikuliarineqartarput il.il.
