Arferit puisillu

Tikaagullik (Balaenoptera acutorostrata) Tikaagullik Nunatta imartaani arferit iluaqutigineqarnerpaat ilagaat, aamma kalaallinit amerlanerpaanit piumaneqarluartuuvoq, piniarneqartarlunilu piffissami 1. april-miit 31. decemberimut. Kommune Kujallermut pisassiissutigineqarsimapput tigaakugilliit arfinillit, angallatit akuerisaasunik qamutilillit tikaagullittassinneqartarput.
Tikaagulliup inersimasup neqaa, orsua mattaalu 2-3 tons missaanik oqimaassuseqarput, taakkulu annermik kommunimi kalaalimineerniarfinni akiginiarneqartarput. Aamma tikaagulliup neqaa tuniniarneqarsinnaavoq Arctic Green Food-ip fabrikkianut Kommunimi nunaqarfiit avannarlersaanni Qassimiuni. Neqi assigiinngitsorpassuanngorlugu nerisassiarineqarsinnaavoq, soorlu kitserlugu siatassaq, stroganoff-iliassaq, uuinnarlugu minnerunngitsumillu nikkuliaralugu. Orsua neqimut orsutaliullugu iganeqartarpoq, nutaanillu katoffililerlugu nerineqartarluni.

Tikaagulliusaaq (Balaenopters physalus) Tikaagulliusaaq nunarsuarmi miluumasut tannersaasa aapparaat, 18-20 meter takissuseqalersinnaasoq. Arfeq ukioq kaajallallugu pisarineqarsinnaavoq, neqaali tigaagulliup neqaaniit mattuneroqaaq mamarpallaaranilu. Neqaa sianneqartarpoq, stroganoffiliarineqartarpoq, iganeqartarpoq nikkuliarineqartarlunilu. Orsua atorneqarajunngilaq. Neqaa orsualu Qassimiuni Arsummilu tunitsivinnut akigineqarajunnerusarput.

Qilalugaq qaqortaq (Delphinapterus leucas) Qilalugaq qaqortaq Avannaani Tunumilu nalinginnaasuuvoq, qoorortuumik piniarneqartarpoq, aammali Kujataani naammattuugassaasarpoq. Kommune Kujallermi arfinillit pisassiissutigineqarsimapput. Neqaa orsualu iganeqartarput sianneqartarlutilluunniit, pingaartumik mattaa mamarluartuuvoq, kalaallit amerlasoorpassuit piumasaqisaat.

Aarluarsuk (Globicephala melas) Arluarsuk Atlantikup avannaata annersaani siaruarsimavoq, ilaanneeriarluni Nunatta kujataani kangerlunnut pulasarpoq. Arfeq 6-7 meter missaanik takissuseqalersarpoq, qoorortuumillu piniarneqartarluni. Neqaa aqitsuuvoq, orsua tarajorterneqartarpoq, nerisassat allanut illuliullugu nerineqartarluni. Orsua neqaalu kalaalimineerniarfinni akiginiarneqartarput.

Aataaq (Phoca groenlandica) Aataaq Kujataani puisit nalinginnaanersaraat, ukiorlu kaajallallugu piniarneqartarluni. Neqaa orsualu kalaalimineerniarfinni tuniniarneqartarput, neqaa orsutalerlugu suaasaliarineqartarpoq. Amia Great Greenlandimut akigineqartarpoq, amia suliarineqartarpoq, qaatiguuliarineqartarpoq, taskiliarineqartarpoq aamma allatut amminik tunisassiarineqartarpoq.

Natsersuaq (Cystophora cristata) Natsersuaq Kujataani nalinginnaasuuvoq, pingaartumik inersimasut upernaakkut sikorsuarni piniarneqartarput. Neqaa nikkuliarineqartarpoq, mamarluartuuvoq, pingaartumik Kommune Kujallermi Nanortallip eqqaani nalinginnaanerpaasarpoq.

Natseq (Phoca hispida) Natseq Nunatta puisaasa minnersaraat, aamma ukioq kaajallallugu qoorortuumik piniarneqartarpoq. Kitaata sikua ilutigalugu Canadami piaqqiorfimminniit ilaatigut tikittarput. Kujataani natsiit sikor-suit peqatigalugit tikittarput. Neqaa orsualu mamarluartuupput, kalaalimineerniarfinnilu akiginiarneqartarlutik.

Ussuk (Erignathus barbatus) Ussuk Kalaallit Nunaanni puisit qaqutigoornersaasa ilagaat. Qangaanerusoq amia piumaneqarluartarpoq, pingaartumik atunngassiarineqartarpoq, allunaaliarineqartarlunilu.

Qasigiaq (Phoca vitulina) Qasigiaq Nunatsinni puisit qaqutigoornersaasa ilagaat, taamaattumik Kujataata imartaani qaqutiguinnaq naammattoorneqartarpoq. Amia piumaneqarluartuuvoq, pingaartumik seeqqinniliassatut piumaneqartaqaat.