Aalisakkat & qaleruallit

Suluppaagaq (Sebastus Spp.) Suluppaagaq aalisagaavoq itisoormioq mamarluartoq aamma Kujataani kangerlunni avasinnerusumilu Davis Strædimi siammarsimavoq. Aalisagaq nunaqavissunit aalisarneqartarpoq, kalaalimineerniarfinnilu Kujataanilu tunitsivinni nioqqutigineqartarluni.

Saarullik (Gadus morhua) Saarullik qangaaniilli Kujataani pingaarnerpaatut aalisartugarineqartarpoq. Aalisagaq tarajortigassaqqissorsuuvoq, siatassaqqissuuvoq, panertugassaqqissuuvoq mikiarsigassaqqissuullunilu. Apriilimiit septembarimut bundgarninik pisarineqartarpoq, ukiorli kaajallallugu pisarineqarsinnaavoq aamma. Aalisagaq Kujataani naliginnaasuuvoq, kalaalimineerniarfinni aalisakkanillu tunitsivinni akiginiarneqartarpoq.

Kigutilik (Anarhichas minor) Kigutilik, danskisut ateruseqartinneqartoq koteletfisk, annerusumik itisoormiuuvoq, ningittakkanillu piniarneqarnerusarluni. Kigutilik pingaartumik Europami nunanut tuniniarneqartarpoq, aalisagarli najugaqavissunit mamarsaatigineqarluartarpoq - igaatut qullukkatullu.

Qaleralik (Reinhardtius hippoglossoides) Qaleralik Kalaallit Nunaanni niuernikkut pingaarutilerujussuuvoq, Davis Stræde-mi Avannaanilu siammarsimavoq. Aalisagaq aamma Kujataani kangerlunni nalinginnaavoq, Europamilu pujuugassanngorlugu tuniniarneqartarpoq, pingaartumik Frankrigi aalisakkamik taassuminnga pisiortorluartuuvoq.

Nipisak (Cyclopterus lumpus) Suanniarneq aallartittarpoq marsip qiteqqunnerani maajip qiteqqunnera tikillugu. Arnarluk qassutinik pisarineqartarpoq sissami immami ikkattumi. Suai paqqersarneqartarput, errortorneqartarput, nappartani tarajorterneqartarput, Europamut tuniniagassanngorlugit. Angusalluit najugaqavissunit mamarsaatigineqartarput aamma pujuugassatsialaavoq!

Eqaluk (Salvelinus alpinus) Eqaluk Kujataata kangerluini kuuinilu nalinginnaasuuvoq, tamaani sissamiit qassutinik qissattaammillu piniarneqartarpoq, ukiarnerani tatsini kuunnilu qissattaammik aalisarneqartarluni. Eqaluk igaassaqqissuuvoq, siatassaqqissuuvoq, panertitassaqqissuuvoq, tarajortigassaqqissuuvoq minnerunngitsumillu pujuugassaqqissuulluni. Aalisagaq kalaalilimineerniarfinni aalisakkanillu tunitsivinni akiginiarneqartarpoq. Annerusumik Nunatsinni tuniniarneqartarpoq, ilamerngili avammut tuniniarneqartarput.

Ammassat (Mallotus villosus) Ammassat Tunumi aamma Jan Mayen-ip Islandillu imartaanni nalinginnaasuuvoq. Upernaakkut ammassat aamma Kujataanut takuttarput, qaammatini suffiffimmini kangerlunni sissani suffiartortarpoq, taamaalinerani qaloorneqartarput. Ammassat igaassaqqissuupput, assigiinngitsorpassuarnik nerisassiarineqartarpoq, uuttatut , siatatut minnerunngitsumillu panertillugu ukiumut peqqumaasiarineqartarpoq.

Kapisilik (Salmo Salar) Kapisilik Kujataata sineriaani augustusimiit oktoberimut nalinginnaasuuvoq, taamaalinerani qassutinik piniarneqartarpoq. Kapisilik nunaqarvissunut pisortallu suliffeqarfiinut akiginiarneqartarpoq. Kapisilik nerisassatsialaavoq, assigiinngitsorpassuanngorlugu igaarineqarsinnaaasoq, minnerunngitsumillu pujuuganngorlugu kitsikkatut.

Uiloq (Mytilus edulis) Uiloq sissani tamani Kujataani nassaassaavoq, arlaanni akulikitsorujussuusarput arlaanilu akuttunerusarlutik. Najugaqavissunit angallanneqarsinnaagaanni uilortarnissamik iluatsitsiviusinnaavoq - najugaqavissut uiloqarfiit sumiissusiinik ilisimasaqarnerat pingaartuummat. Kujataani uillit silaannaap kissarnera pissutigalugu angisuukullassuanngortarput - mamarluartuullutillu. Kujataani uillut kalaalimineerniarfinnit akiginiarneqartarput.

Eqqusaq (Strongylocentrus droebachiensis) Eqqusat kinguaassiuuttaat amerlasuunit nalilerneqartarput uiluittut mamartigisutut - kangiani nerisassaq pimaneqarluartoq. Ukiumut eqqusat 60.000 tons missingi kangiani aalisagaarniarfinnut eqqussorneqartarput. Kujataani qassutinik pullatinilluunniit piniarneqartarput. Eqqusat kalaalimineerniarfiinnarni akiginiarneqartarput.