INUILI - Nerisassiornermik ilinniarfik ilisimasanillu eqiteruffik

INUILI-mi ilinniartitaaneq INUILI inuussutissalerinermik ilinniarfiuvoq nutaaliaasoq pimoorussisunik ilinniartitsisulik, ilinniagassanik makkuninnga neqerooruteqartut: igasoq, saqisoq, akunnittarfilerisut takornarialerisullu, cafeteriami kantiinamilu sulisut, neqilerisut, saaffiginnittarfimmi sulisut nerisassiortullu. Pikkorissarnerit Aalajangersimasumik sammisalinnik ilinniartitaanerup saniatigut, INUILI-p neqeroorutigisarpai nerisassalerinerup iluani pikkorissarnerit assigiinngitsut ilinniaqqinnissamillu neqeroorutit. Atuarfik ilisimasanik eqiteruffittut INUILI aamma pingaarutilimmik inissisimavoq, kalaallit tunisassiaannik ineriartortitsinissamut ilisimasanik eqiteruffittut. Inuussutissalerinermik ilinniarfiup ataqqisorujussuullugulu pissusissamisoortippaa kalaallit nioqqutissiassaataannik atuinissaq. Ukiut ingerlanerini atuarfik ilisimasassarpassuaqalersimavoq, ilaatigut kinguaariinniit utoqqaanerusunik oqaloqatiginnittarnerit aqqutigalugit. Tamatumani siulliarsuit naasunik atuisarnerat nassaareqqinneqarsimavoq, aamma ukiut ingerlanerini nammineq nutaanik misilittagaqalersimavugut nerisassiugassanik. Atuarfimmi nerisassiassat atorneqarnerpaat taassaapput paarngat, sulluitsut, naasut, pupiit, soorunalumi aalisakkat, timmissat, miluumasut imarmiut nunamiullu. Tunisassianik ineriartortitsineq Inuussutissalerinermik ilinniarfiup sulissutigiuarpaa, tunisassianik soqutiginartunik nutaanik ineriartortitsinissaq, nerisassiassanik Nunatsinni pinngortitameersunik. Atuarfiup nuannaarutigiuaannartarpaa tunisassiaq nutaaq iluatsilluarsimasorlu sassaalliutigigaangamiuk, inniminnigaasimappat imminulluunniit nerisassiaasimappat. GM Ukiat tamaasa INUILI soqutigineqarluartartumik Nunatsinni Iganermik Pissartanngorniutsitsisarpoq, inuussutissarsiutigalugu igasut Nunatsinni neriniartarfinnit pitsaanerpaaneersunit peqataaffigineqartartumik. Taamatuttaaq atuarfiup igasunngorniartui aamma Pissartanngorniutsinneqartarput. INUILI Postboks 123 3921 Narsaq tlf. 66 13 13 fax 66 13 33 inuili@inuili.gl Nittartakkatsinni paasiniaaqqissinnaavutit:: www.inuili.gl.