Nittartakkami uani ilisaritinniarpagut nerisassarpassuit Kujataaneersut naleqanngitsut. Aamma nerisassanik assigiinngitsorpassuarnik misigisassarsiornissamut isumassarsiassaqartikkusuppatsigit.

Kujataani najukkatsinni silaannaq kissartoq nunalerinermut naatitsinermullu tunngavissaqartitsilluarpoq. Taamaattumik tamaani savaateqarnermik ileqquusut tulluusimaarnartut naammattoorsinnaavatit, savaaqqat ukiumut 25.000-tit missaat Nunatsinni tuniniagassat tunisassiarineqartarput. Tamaani naatinneqartarput katorfilit (naatsiiat), naatitat assigiinngitsut, salaatit tomatillu. Aamma tamaaniippoq tuttuuteqarfik neqitugassaqartitsisoq, immattalu avatitsinniittup naammattunik aalisagassaqartillutalu assagiarsussaqartippaatigut.

Narsami, Nanortalimmi Qaqortumilu kalaalimineerniarfitsinni tuniniarneqartarput aalisakkat piniartullu ulluunerani pisarisartagaat, soorlu puisit neqaat, tikaagulliit neqaat timmissallu. Taakku saniatigut immikkuullarissunik assigiinngitsunik tunisassiortoqartarpoq, soorlu igutsaap tungusunnitsuutaa, mamalaadit, taratsut, nerisassanut akoorutissat allarpassuillu.

Tassalu soorlu takusinnaagit, Kujataa sassaalliutissarpassuaqarpoq, Nunatsinni nerisassatsialarpassuarnik.

Taamaattumik pissusissamisoorluinnarpoq, suliffeqarfiutivut inuussutissalerinermillu ilinniarfik INUILI suleqatigalugit inuussutissalerinermik suliniuteqarnerput, tunisassianik pitsanngorsaajuarnikkut nutaaliortuaannarnikkullu. Tassami Kujataa nunatsinni nerisassaasivinngortinniarparput! Aamma tunisassiassaatitsialaatigut nerisassiassaatitsialaatigullu Nunatsinni innuttaaqatigut, tikeraartigut allallu peqatigalugit kajunnguteqatigerusuppavut.

Pitsaanerusoqarnerpa nerrivimmi illinnarsarluakkanik sassaallerfiusumi upakkaanni, nerisassiat pitsaalluinnartut misigisaqarfigalugit, "Kujataatalu nerisassaatai" mamarsaatigilluarlugit.

Kalistat Lund
Inuussutissarsiornermut ataatsimiititaliap siulittaasua
Kommuna Kujalleq

Nittartakkap Kalaallit Nunaanni Brugsen-imit aningaasaliiffigineqarpoq!